കൊച്ചി :

8 ലക്ഷത്തിലധികം കണ്ടെയിനറുകള്‍ ഒരു സാമ്പത്തിക വര്‍ഷം കൈകാര്യം ചെയ്ത് കൊച്ചി വല്ലാര്‍പ്പാടം ഇന്റര്‍നാഷണല്‍ കണ്ടെയ്നര്‍ ട്രാന്‍സ്ഷിപ്മെന്റ് ടെര്‍മിനല്‍ പുതു ചരിത്രം രചിച്ചിരിക്കുന്നു. 

കേരളത്തിനാകെ അഭിമാനകരമായ ഈ നേട്ടം നമ്മുടെ നാട് ആഗോള ഷിപ്പിങ്ങ് റൂട്ടിലെ ഒഴിച്ചുകൂടാനാകാത്ത ഇടമായി മാറുന്നുവെന്ന വസ്തുത ഒന്നുകൂടി ഊട്ടിയുറപ്പിക്കുകയാണ്. 2024-25 സാമ്പത്തികവര്‍ഷം മാത്രം 8,34,665 ടി.ഇ.യു കണ്ടെയിനറുകളാണ് വല്ലാര്‍പ്പാടം വഴി കൈമാറ്റം ചെയ്തിരിക്കുന്നത്. കഴിഞ്ഞ വര്‍ഷത്തെ അപേക്ഷിച്ച് 11 ശതമാനം വളര്‍ച്ചയാണ് ഡിപി വേള്‍ഡിന് കീഴിലുള്ള ഈ ടെര്‍മിനലിനുണ്ടായത്.

ദക്ഷിണേന്ത്യയില്‍ ഒരു വര്‍ഷം ഏറ്റവും കൂടുതല്‍ കപ്പലുകള്‍ അടുത്ത തുറമുഖമെന്ന നേട്ടവും വല്ലാര്‍പ്പാടം ടെര്‍മിനല്‍ ഈ വര്‍ഷം സ്വന്തമാക്കി. 640 കപ്പലുകളാണ് ഇവിടെയെത്തിയത്. ഇതില്‍ നിന്നായി 2,255 ടണ്‍ കാര്‍ഗോയും ഈ വര്‍ഷം കൈകാര്യം ചെയ്തു. കേരളത്തില്‍ നിന്നുള്ള കയറ്റുമതിയിലും വലിയ വര്‍ധനവ് സമീപകാലങ്ങളിലായി രേഖപ്പെടുത്തുകയാണ്. 

പ്രധാനമായും യൂറോപ്യന്‍ രാജ്യങ്ങളിലേക്കും ഗള്‍ഫ് രാജ്യങ്ങളിലേക്കുമായിരുന്ന കയറ്റുമതി ഇപ്പോള്‍ അമേരിക്കന്‍ വന്‍കരയിലേക്കും ആഫ്രിക്കയിലേക്കുമുള്‍പ്പെടെ വ്യാപിക്കുകയാണ്. വല്ലാര്‍പ്പാടത്തിലൂടെ കേരളം കൈവരിക്കുന്ന ഈ കുതിപ്പ് ദക്ഷിണേന്ത്യയിലെ ലോജിസ്റ്റിക്‌സ് മേഖലയിലെ ഹബ്ബായി കൊച്ചിയെ മാറ്റാന്‍ കൂടി സഹായിക്കുമെന്നാണ് ഞങ്ങള്‍ പ്രതീക്ഷിക്കുന്നത്.