തിരുവനന്തപുരം: സംസ്ഥാനത്ത് ചൊവ്വാഴ്ചയും വേനല്‍മഴയ്ക്ക് സാധ്യതയെന്ന് കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. കേരളത്തില്‍ വേനല്‍ മഴ തുടരുമെന്നാണ് അധികൃതര്‍ അറിയിച്ചിരിക്കുന്നത്. ഇന്ന് ഉച്ചയ്ക്ക് ശേഷം വിവിധയിടങ്ങളില്‍ കനത്ത ഇടിമിന്നല്‍ അനുഭവപ്പെടാനും സാധ്യതയുണ്ട്. ഈ സാഹചര്യത്തില്‍ ജാഗ്രത പാലിക്കണമെന്നും മുന്നറിയിപ്പുണ്ട്.

കഴിഞ്ഞ ദിവസങ്ങളിലും സംസ്ഥാനത്ത് വേനല്‍ മഴ ലഭിച്ചിരുന്നു. തിങ്കളാഴ്ച തിരുവനന്തപുരം, കൊല്ലം, ഇടുക്കി, കോഴിക്കോട്, മലപ്പുറം, വയനാട്, കണ്ണൂര്‍ എന്നീ ജില്ലകളില്‍ വേനല്‍ മഴ ലഭിച്ചു. അതേസമയം അപ്രതീക്ഷിത മഴയില്‍ ചിലയിടങ്ങളില്‍ നാശനഷ്ടങ്ങളുമുണ്ടായി. മഴയ്‌ക്കൊപ്പം കാറ്റുമുണ്ടായതാണ് അപകടങ്ങള്‍ക്കിടയാക്കിയത്.

മലപ്പുറത്ത് ശക്തമായ മഴയില്‍ സ്‌കൂളിന്റെ സീലിങ് തകര്‍ന്നുവീണു. മലപ്പുറം വണ്ടൂര്‍ വാണിയമ്പലം എല്‍പി സ്‌കൂളിന്റെ സീലിങ്ങാണ് തകര്‍ന്നത്. ശക്തമായ കാറ്റടിച്ചതോടെ കുട്ടികള്‍ മാറിയതിനാല്‍ വന്‍ അപകടം ഒഴിവായി. സ്‌കൂളിലെ സെന്‍ഡ് ഓഫ് ചടങ്ങിനിടെയായിരുന്നു സംഭവം. 250 ഓളം കുട്ടികള്‍ ഹാളിലുണ്ടായിരുന്നു. വിദ്യാര്‍ഥികള്‍ മാറിയതിന് പിന്നാലെയാണ് സീലിങ്നിലംപതിച്ചത്.