INDIA
സിപിഐ പാര്‍ട്ടി കോണ്‍ഗ്രസ് ; മഹാറാലിയോടെ ഉജ്വല തുടക്കം
|
സ്വന്തം ലേഖകന്‍ | 15.Oct.2022 |
വിജയവാഡ
സിപിഐ 24--ാം പാര്‍ടി കോണ്‍ഗ്രസിന് ആന്ധ്രപ്രദേശിലെ വിജയവാഡയില്‍ ഉജ്വല തുടക്കം. ബിആര്‍ടിഎസ് റോഡ് ചത്വരത്തില്‍നിന്ന് തുടങ്ങിയ ലക്ഷംപേര്‍ അണിനിരന്ന വമ്പന്‍ പ്രകടനം നഗരത്തെ ചുവപ്പണിയിച്ചു. 24 ചെങ്കൊടികളുമായി വനിതാ വളന്റിയര്‍മാര്‍ ആദ്യം നീങ്ങി. സിപിഐ ജനറല്‍ സെക്രട്ടറി ഡി രാജ, കേന്ദ്ര സെക്രട്ടറിയറ്റ് അംഗങ്ങളായ കെ നാരായണ, പല്ലബ്‌സെന്‍ ഗുപ്ത, അമര്‍ജിത് കൗര്‍, ആന്ധ്ര സംസ്ഥാന സെക്രട്ടറി കെ രാമകൃഷ്ണ തുടങ്ങിയവര്‍ നയിച്ചു. ആന്ധ്രയ്ക്ക് പുറമേ തെലങ്കാനയില്‍നിന്നുള്ള പ്രവര്‍ത്തകരും അണിചേര്‍ന്നു. സി നാഗേശ്വരറാവു നഗറില്‍ (എംബി സ്റ്റേഡിയം) പൊതുസമ്മേളനം ഡി രാജ ഉദ്ഘാടനം ചെയ്തു.
കനത്ത മഴയെത്തുടര്‍ന്ന് കാര്യപരിപാടികള്‍ അവസാനിപ്പിച്ചു. തുടര്‍ന്ന് പ്രജന നാട്യമണ്ഡലി പ്രവര്‍ത്തകരുടെ കലാപരിപാടികള്‍ അരങ്ങേറി. പ്രതിനിധി സമ്മേളനം ഗുരുദാസ് ദാസ് ഗുപ്ത നഗറില്‍ (എസ്എസ് കണ്‍വന്‍ഷന്‍ സെന്റര്‍) ശനിയാഴ്ച തുടക്കമാകും. പ്രവര്‍ത്തന റിപ്പോര്‍ട്ട്, കരട് രാഷ്ട്രീയ പ്രമേയം, രാഷ്ട്രീയ അവലോകന റിപ്പോര്‍ട്ട് എന്നിവ അവതരിപ്പിക്കും. വിവിധ സംസ്ഥാനങ്ങളില്‍നിന്ന് തെരഞ്ഞെടുക്കപ്പെട്ട 900 പ്രതിനിധികള്‍ക്ക് പുറമേ 16 വിദേശരാജ്യങ്ങളിലെ കമ്യൂണിസ്റ്റ് പാര്‍ട്ടികളെ പ്രതിനിധാനംചെയ്ത് 30 പേരും പങ്കെടുക്കുന്നുണ്ട്.
Last Update: 15/10/2022
MORE IN NEWS
