പൃഥ്വി രാജ് കേന്ദ്രകഥാപാത്രത്തെ അവതരിപ്പിച്ച ആടു ജീവിതം അവാര്‍ഡ് പടമാണെന്ന് സിനിമയുടെ പ്രിവ്യൂ കണ്ടവരുടെ അഭിപ്രായ വീഡിയോ സോഷ്യല്‍ മീഡിയയില്‍ തരംഗമാകുന്നു.

വന്‍കിട മാര്‍ക്കറ്റിങ് കമ്പനികളുടെ സഹായത്തോടുകൂടി ലോകമെമ്പാടും ഈ സിനിമ റിലീസ് ചെയ്യാന്‍ ആടുജീവിതം ടീം ശ്രമിച്ചിരുന്നു. മലയാളത്തിനു പുറമെ വിവിധ ഭാഷകളില്‍ കൂടി പുറത്തിറങ്ങുന്ന ആടുജീവിതം തിയേറ്ററുകളിലേയ്ക്ക് ആളുകളെ എത്തിയ്ക്കുമോ ? 

വിവിധ ഭാഷകളില്‍ നിര്‍മ്മിച്ചിട്ടും അറബിഭാഷയിലോ ഇംഗ്ലീഷിലോ  ഗള്‍ഫ് നാടുകളില്‍ റിലീസ് ചെയ്യാനുള്ള ശ്രമം വിഫലമായി . പൃഥ്വി രാജിന്റെ ആട് ജീവിതം സിനിമയ്ക്ക് ഗള്‍ഫ് ഒട്ടാകെയുള്ള റിലീസ് എന്ന സ്വപ്‌നം വിദൂരമാണ് .

ചില ഗള്‍ഫ് രാജ്യങ്ങളില്‍ പേരിനു റിലീസിന് തയ്യാറായിട്ടുണ്ട് . മലയാളത്തില്‍ മാത്രമാണ് റിലീസിനു അനുമതി ഉള്ളത് . മറ്റ് ഭാഷകളില്‍ കൂടി റിലീസ് ചെയ്യിപ്പിക്കാനുള്ള പരിശ്രമം നടക്കുന്നു. റിലീസിനു മുന്നേ എല്ലാ പ്രശ്‌നങ്ങളും പരിഹരിയ്ക്കാന്‍ കഴിയുമെന്ന് അണിയറ പ്രവര്‍ത്തകര്‍ കരുതുന്നു.

ബെന്യാമിന്റെ ആടു ജീവിതം എന്ന നോവലിനെ ആസ്പദമാക്കിയാണ് പൃഥ്വി രാജ് ചിത്രം ഒരുങ്ങിയത് . നോവലിന്റെ പേരില്‍ ബ്ലസി സംവിധാനം ചെയ്ത ഈ സിനിമയില്‍ നജീബിന്റെ വേഷമാണ് പൃഥ്വി രാജ് അഭിനയിച്ചത് .

മണലാരണ്യത്തിലെ നജീബിന്റെ ജീവിതവും അതിജീവനവും ചര്‍ച്ച ചെയ്യുന്ന ഈ സിനിമ ഗ്രാഫിക്‌സിന്റെ അതിപ്രസരത്തോടുകൂടിയാണോ പൂര്‍ത്തിയാക്കിയത് ?  യഥാര്‍ത്ഥ വിഷ്വലുകള്‍ എത്രത്തോളം ? തള്ളിമറിയ്ക്കുന്നതിന് അപ്പുറം ഈ സിനിമയുടെ പ്രസക്തി എന്താണ് ? പടത്തിന്റെ റിലീസോടു കൂടി മാത്രമേ ഈ ചോദ്യങ്ങള്‍ക്ക് ഉത്തരം കിട്ടൂ.

തെലുങ്കിലെ സിനിമ പ്രവര്‍ത്തകര്‍ക്കും ക്ഷണിയ്ക്കപ്പെട്ട അതിഥികള്‍ക്കുമായി നടത്തിയ പ്രിവ്യൂ ഷോയ്ക്ക് ശേഷമുള്ള പ്രതികരണ വീഡിയോ പുറത്തു വന്നിട്ടുണ്ട് . പൃഥ്വി രാജിന് ആടുജീവിതത്തിലെ അഭിനയത്തിനു നാഷണല്‍ അവാര്‍ഡ് കിട്ടുമെന്നാണ് ഈ വീഡിയോയില്‍ തെലുങ്ക് സിനിമ പ്രവര്‍ത്തകര്‍ പറയുന്നത് . ചെറുതും വലുതുമായ നിരവധി അവാര്‍ഡുകള്‍ ആടുജീവിതം അഭിനേതാക്കളും സാങ്കേതിക പ്രവര്‍ത്തകരും നേടുമെന്നാണ് അണിയറ വര്‍ത്തമാനം. 

കേരള സംസ്ഥാന ചലച്ചിത്ര അവാര്‍ഡ് മുതല്‍ ഭാരത സര്‍ക്കാരിന്റെ ദേശീയ പുരസ്‌ക്കാരവും , വിദേശത്ത് ഓസ്‌ക്കാര്‍ വരെയും ആട് ജീവിതം നേടുമെന്നാണ് പൃഥ്വി ആരാധകരുടെ പ്രതീക്ഷ.