വിര്‍ച്വല്‍ സാങ്കേതികതയുടെ സഹായത്തോടെ സ്‌കൂളുകളില്‍ ആരോഗ്യ പ്രതിരോധ - സംരക്ഷണ പ്ലാറ്റ്ഫോം ഒരുക്കുകയാണ് കൊച്ചി കിന്‍ഫ്ര ഹൈ ടെക് പാര്‍കിലെ കേരള ടെക്നോളജി ഇന്നോവേഷന്‍ സോണിലെ സ്റ്റാര്‍ട് അപ് ആയ ഷോപ് ഡോക്. ആ പ്രൊജക്ടിന് നേതൃത്വം കൊടുക്കുന്നത് ഒരു പെണ്‍കുട്ടിയാണെന്നത് ഏറെ സന്തോഷം നല്‍കുന്ന കാര്യമാണെന്ന് ആരോഗ്യമന്ത്രി വീണ ജോര്‍ജ്ജ് പറഞ്ഞു .

പ്രൊജക്ട് ഹെഡ് മെഹ്നാസ് അബൂബക്കര്‍ എത്തി പദ്ധതിയെക്കുറിച്ച് ആരോഗ്യമന്ത്രിയോട് വിശദീകരിച്ചു. ലോകത്ത് ആദ്യമായാണ് മെറ്റവേഴ്സില്‍ സ്‌കൂളുകള്‍ക്ക് ആരോഗ്യ പ്രതിരോധ - വിദ്യാഭ്യാസ സംബന്ധമായ സേവനം ഒരുക്കുന്നതെന്ന് മെഹ്നാസ് പറഞ്ഞു.   സ്മാര്‍ട് ഹെല്‍ത്ത് ക്ലിനിക്കുകള്‍ വഴി രോഗ പ്രതിരോധ പ്രവര്‍ത്തനങ്ങളും വിപുലമായ ആരോഗ്യ സംരക്ഷണ പ്രവര്‍ത്തനങ്ങളുമാണ് ആരോഗ്യ രംഗത്തെ സ്റ്റാര്‍ട് അപ്പായ ഷോപ് ഡോകിന്റെ ലക്ഷ്യം. മൈ സ്‌കൂള്‍ ക്ലിനിക്സ് സേവനം വെബ്സൈറ്റിനൊപ്പം മൊബൈല്‍, മെറ്റാവേഴ്സ് ആപ്ലിക്കേഷനുകളിലും ലഭ്യമാകുമെന്ന് മെഹ്നാസ് അറിയിച്ചു. മെഹ്നാസിനും ടീമിനും മന്ത്രി ആശംസകള്‍ നേര്‍ന്നു.